9 වරක් විවාහවී 99 වසරක් ජීවත් වූ හොලිවුඩ් නිළි “සා සා ගේබර්”

හොලිවුඩ් චිත්‍රපට හා ටෙලි නාට්‍ය හැටක රඟපෑ රූමත් නිළි සා සා ගේබර් ජනප්‍රිය වූයේ සිනමාවේ හා රූපවාහිනියේ ඇගේ රඟපෑම්වලටත් වඩා පෞද්ගලික ජීවිතය ආශ්‍රිත තොරතුරු හේතුවෙනි.
හෘදයාබාධයක් වැළඳී ලොස් ඇන්ජලීස් නගරයේදී මියයනවිට වයස අවුරුදු අනූනවයක්වූ ඇය තව මාස දෙකකටත් අඩු කාලයක් එනම් ලබන පෙබරවාරි හයවැනිදා තෙක් ජීවත් වූයේ නම් ඇයට වයස අවුරුදු සියයකි. නවවරක් විවාහවූ සා සාගේ සැමියන් අතරින් එක් අයෙකු හැර අනෙක් සියල්ලෝම කුමන හෝ අංශයකින් ප්‍රකට පුද්ගලයන්ය. සැමියන් අටදෙනෙකුම ඇයට පෙර මියගිය අතර ඇයට වඩා වැඩි කලක් ජීවත් වූයේ හා වැඩිම කලක් ඇය හා විවාහ දිවිය ගතකළේ නවවැනි හා අවසන් සැමියාවූ ෆේ‍රඩ්රික් වොන් ඔන්හොල්ට්ය.
ඇය හා විවාහවූ පුද්ගලයන් අතර සුප්‍රකට හිල්ටන් හෝටල් ජාලය හිමි කොන්රඩ් හිල්ටන්ද වෙයි. විවාහ නවයෙන්ම ඇයට සිටින එකම දරුවාද එම විවාහයෙන් ලැබූ දියණියයි. නිළියක වූ ෆ්රැන්සෙස්කා හිල්ටන්ද පසුගිය වසරේදී මිය ගියාය.
හංගේරියාවේ බුඩාපෙස්ට් නගරයේ සාරි ගේබර් ලෙස උපත ලැබූ සා සා ගේ අනාගත බලා‍පොරොත්තුව වූයේ පශු වෛද්‍යවරියකවීම වුවද රූමත් දියණියට ඊට වඩා තැනකට යන්නට හැකිවෙතැයි සිතූ ඇගේ මව සා සා ව නිරූපණ ක්‍ෂේත්‍රයට යොමුකළාය. 1936 වසරේදී හංගේරියානු රූ රැජින ලෙසද කිරුළුපළන් ඇයට හොලිවුඩයේ දොර විවරකරවා ගැනීම අපහසු කරුණක් වූයේ නැත.

මව හා දියණියන් තිදෙනා දෙවන ලෝක යුද සමයේදී ඇමෙරිකාවේ පදිංචියට පැමිණි අතර පනහ දශකය වනවිට රංගනය තුළින් මෙන්ම තම සමාජශීලී ජීවිතය තුළින්ද රට තුළ නම පැතිරවීමට ගේබර් සොයුරියෝ සමත්ව සිටියහ. මව ඇමෙරිකාවේ ආභරණ වෙළෙඳ ජාලයක් ආරම්භ කළ අතර ඇයද රූපවාහිනි ටෙලි නාට්‍ය මාලාවක රඟපෑමෙන් ජනප්‍රිය වූවාය. හංගේරියානු හඬකින් ඉංග්‍රීිසි කතාකළ සා සා  ඩාලින් යනුවෙන් ‍පොදුවේ සියල්ලන් ඇමතූ අතර එය ඇසුණේ “ඩාලින්ක්” ලෙසය. දියමන්ති හා මිල අධික ඇඳුම්වලට දැඩි ඇල්මක් දැක්වූ ඇය තම දික්කසාදයන් ගැන කියූ ප්‍රකට කතාවක් වන්නේ එයාලා දුන්න දියමන්ති ආභරණ ආපහු දීලා දාන්න තරම් මට මගේ හිටපු මහත්තුරුන්ව එපාවුණේ නැහැ” යන්නයි. හැම දික්කසාදයකින් පසුවම තමා සැමියා හා පදිංචිව සිටි ඔහුගේ නිවස තමාටම ලබාගැනීමට සමත්වීම ගැනද ඇය නිතර උදම් ඇනුවාය. සිනමාවේ හා රූපවාහිනියේදී පියයුරු පෙනෙන ලෙස කර පළල් ඇඳුම් ඇඳීම ගැනද ප්‍රකට සා සා තමාගේම චරිතයද ආරාධිත රංගනයක් ලෙස කිහිපතාවක්ම ඉදිරිපත්කොට තිබේ. තම සොයුරියන් වන ඊවා හා මැග්ඩා ද කලා ලොවට පිවිස සිටියද ඔවුන් අභිභවමින් ඉදිරියට ගිය ඇය, 90 දශකය වනවිටත් ඒ ජනප්‍රියත්වය රැකගන්නට සමත්ව සිටියාය. ගේබර් සොයුරියන් ලෙස ඔවුන් ප්‍රකටවූ අතර ඒ දෙදෙනාම මියගියේ ඇයට පෙරය. සා සා වරක් විවාහව සිටි ජනප්‍රිය නළු ජෝර්ජ් සෑන්ඩර්ස් පසුව විවාහවූයේ සා සා ගේ සොයුරියවූ මැග්ඩා සමගය.
“කෙල්ලෙක් කසාද බඳින්න ඕනෙ ආදරය කරන කෙනාව. ඒ ආදරය එයාගෙන් නොලැබුණොත් නියම ආදරය ලැබෙනතුරු කසාද බඳින්න ඕනෙ.” ඒ මාධ්‍ය අවධානය දිනාගත් සා සාගේ කියමන් අතරින් එකකි. තම මුල්ම පෙම්වතා වූ නූතන තුර්කියේ නිර්මාතෘ ඇය හා විවාහවූවන් අතර තුර්කි තානාපතිවරයෙකු, ජනප්‍රිය නළු ජෝර්ජ් සෑන්ඩර්ස්, අතිශයින් ධනවත් ව්‍යාපාරිකයන් දෙදෙනකු, සෙල්ලම් භාණ්ඩ සැලසුම්කරුවෙකු, (සුප්‍රකට බාබි ඩෝල් බෝනික්කා ඔහුගේ නිර්මාණයකි) දික්කසාද සම්බන්ධයෙන් ප්‍රකට නීතිඥයෙකු හා මෙක්සිකානු නළුවෙකුද වෙයි. එක්දිනකට පමණක් සීමාවූ මෙක්සිකානු නළුවා සමග විවාහය පසුදිනම අවලංගු කරගත් බැවින් එය තම විවාහයක් ලෙස ගණන් ගතයුතු නැති බව සා සාම කියා තිබේ. විවාහ අතර කාලයේදී පෙම්වතුන් ඇසුරු කිරීම අතින්ද ඇය ප්‍රකට වූ අතර තම පළමු පෙම්වතා ලෙස ඇය පවසා ඇත්තේ නූතන තුර්කියේ නිර්මාතෘ කේමල් අටාතුර්ක්ය.

1989 වසරේදී සා සා අත්අඩංගුවට පත්වූයේ තමා වලංගු ගමන් බලපත්‍රයක් නොමැතිව හා මෝටර් රිය තුළ අඩක් පානය කළ වොඩ්කා බෝතලයක්ද අතැතිව ගමන් කරද්දි රිය නැවැත්වූ ‍පොලිස් නිලධාරියෙකුට කම්මුල් පහරක් දීම හේතුවෙනි. පැය හැත්තෑ දෙකක සිර දඬුවමක් විඳින්නට ඇයට සිදුවිය. හොලිවුඩ් නිෂ්පාදන වූ ඉතාලි, ප්‍රංශ, ජර්මානු හා ඔස්ට්‍රේලියානු චිත්‍රපටවලද රඟපෑ ඇගේ හොඳම රඟපෑම් ඇතුළත් වූයේ මවුලින් රූච් හා ලිලි යන චිත්‍රපටවල බව විචාරක මතයයි. තම අත්දැකීම් ඇසුරින් ‍පොත් හතරක් වෙනත් ‍ලේඛකයන්ගේ උදව්ද ඇතිව ලියා ඇති ඇගේ “සා සාස් කම්ප්ලිට් ගයිඩ් ටු මෙන්” (පිරිමින් සම්බන්ධ සා සා ගේ මාර්ගෝපදේශයන්) හා “හව් ටු කැච් අ මෑන්, හව් ටු කීප් අ මෑන්, හව් ටු ගෙට් රිඩ් ඔෆ් අ මෑන් (පිරිමියෙකු ග්‍රහණය කරගන්නා, ඔහු රඳවාගන්නා හා ඔහුගෙන් මිදෙන ආකාරය) යන ‍පොත් සුවිශේෂීය. තැපැල් මගින් ඇනවුම්කොට රූපලාවන්‍ය ආ‍ලේපන ගෙන්වා ගතහැකි සමාගමක්ද ඇය පවත්වාගෙන ගියාය. ඇය තරමක් වියපත්ව මුහුණේ රැලි නැතිකර ගැනීමේ ප්ලාස්ටික් සැත්කමකට මුහුණ දුන් බවට කටකතාවක් පැතිරිණි. ඒ බව ඔප්පුකරන කෙනෙකුට ඇමෙරිකානු ඩොලර් මිලියනයක් දෙන බවට සා සා නිවේදනය කළාය.

අධි සුඛෝපගෝගී ජීවිතයක් ගතකළ සා සා සතුව විවිධ ඇඳුම් පන්දහසක් නිතර තිබූ බවද ඒවා දැමීම සඳහා විශේෂයෙන් සකස් කළ අල්මාරියක් ඇති බවද ප්‍රකටය. මේ ගවුම් අතරින් වඩා ප්‍රකටවූ ගවුම් ඇය වරින්වර වෙන්දේසිකරවා ඒ මුදල් සමාජ සේවා කටයුතුවලට දුන්නාය. 2009 වසරේදී හෙළිවූ බර්නාඩ් මැඩොෆ් විසින් සිදුකරන ලද මූල්‍යමය වංචාවට ඔහුගේ සමාගමෙහි මුදල් තැන්පත් කළ ඇයද ගොදුරුවූ අතර මෙහිදී සා සා ට අහිමිවූ මුදල ඇමෙරිකානු ඩොලර් මිලියන දහයකට ආසන්නය. තම වයස සැඟවීමට නිරතුරු උත්සාහ කළ සා සා උපන් වසර නොකියා දිනය පමණක් කීමට නිතර කල්පනාකාරී වූවාය.
ගැහැනු ළමුන්ගේ හොඳම මිතුරා දියමන්ති බවට ප්‍රකට ඉංග්‍රීිසි කියමනක් වෙයි. 1987 වසරේ දිනක සාදයකට සහභාගිවූ අවස්ථාවේ කතාවක් පවත්වමින් සා සා  මෙසේ කීවාය.
“මේ වෙනකොට මට තේරිලා තියෙනවා ගෑනු ළමයෙකුගේ හොඳම යාළුවා දියමන්ති නමෛයි දික්කසාද නීතිඥයො කියලා.”
ඇය එසේ කීවේ දික්කසාද නඩු සඳහා දක්ෂ නීතිඥයන්ගේ සහය ලබාගත් තමා දිනාගත් වස්තු සම්භාරය ගැන කල්පනා කරමිනි.

නිශානි දිසානායක